Dende o colectivo de membros da Asociación Terra de Outes dámoslle a benvida ao noso portal e agradecémoslle o seu interese na nosa actividade.
Os nosos obxectivos son reaccionar diante de calquera alarma medioambiental ou demanda de dereitos e libertades sociais, ademais de actuar na dinamización da vida cultural de Outes ou a protección do patrimonio histórico, etnográfico, natural e marítimo-fluvial.
Xa está a venda nas librarías e nos quioscos dos concellos de Outes e Noia, o nº 70 da revista TERRA DE OUTES, ao prezo como sempre de 1 euro.
Podes visitar os números anteriores da nosa revista aquí.
Outras publicacións
As publicacións máis recentes da asociación son:
Caderno "O "sancosmeiro", historia dun chapeu que merece ser revisada", de Luís do Río.
Serie "Os hórreos de Outes", de Xoán Mariño. Levamos publicados dous libros desta colección:
Os hórreos de Cando.
Os hórreos de San Ourente.
Os hórreos de San Cosme.
Os hórreos de San Pedro de Outes.
Lugares de distribución das publicacións:
Revista trimestral:
Outes: Libreria Pimpiniño e Kiosko Vicente.
Noia: Kiosko Alameda, Kiosko Maruxa, Libreria Loroño e Libreria Blanco.
Libros:
Outes: Libreria Pimpiniño.
Noia: Libreria Sementeira, Libreria Loroño e Libreria Blanco.
GRUPO DE TEATRO DA ASOCIACIÓN TERRA DE OUTES
O grupo de teatro da Asociación Cívico Cultural “Terra de Outes” do concello de Outes naceu en xaneiro de 2023, despois dunha proposta de dúas persoas veciñas do concello, membros da asociación e participantes doutros colectivos teatrais, vendo a eiva cultural no campo da escena teatral no concello e co afán de construir unha nova ferramenta de atracción dinamizadora e unificadora da vida cultural, e non só, do concello de Outes.
Tentamos, desde un primeiro momento, recadar e involucrar toda a xente posíbel do propio concello, acadando ao final unha alta porcentaxe de participación local.
Na actualidade estamos preparando a obra: "O DOENTE IMAXINARIO...daquela maneira" que se estreará o día 5 de abril na Casa da Cultura de Outes dentro da programación da I Mostra "Nicolasa Añón" de teatro amador de Outes, organizada pola Asociación Terra de Outes e que conta coa colaboración do Concello de Outes.
A asociación recibiu en 2024 unha subvención da Deputación da Coruña para a compra dun equipo de iluminación que nos permitirá mellorar a calidade das nosas representacións.
TERRA DE OUTES E O PATRIMONIO MARÍTIMO
MAR DE OUTES
Desde que no ano 2013, Terra de Outes organizara o XI Encontro de Embarcacións Tradicionais de Galicia no Freixo, as actividades na promoción e defensa do noso patrimonio marítimo non pararon de medrar. E as embarcacións das que se fai cargo a asociación tampouco; na actualidade contamos con 5: o bote de Noia Langaño, a buceta Támara, dúas dornas e a canoa Donas.
Case todos os anos, organizamos un curso de vela tradicional no que poden participar todas aquelas persoas interesadas e nos meses de maio e xuño, damos a coñecer as nosas embarcacións e a nosa ría aos escolares da comarca, sempre en colaboración coa nosa asociación irmá "Mar de Muros" e o Concello de Outes dentro do programa da Xunta "Xogando coa auga e o vento".
Tamén damos acoñecer o noso patrimonio marítimo e o noso concello en encontros de embarcacións tanto en Galicia como noutras comunidades (Euskadi, Murcia) e mesmo en Portugal, viaxando sempre que podemos co Langaño e a Támara.
Na actualidade estamos embarcados nun proxecto de dinamización do Espazo Museístico da Carpintaría de Ribeira do estaleiro de Broña coa finalidade de enriquecelo creando un museo “vivo” adicado a mostrar (tamén) as técnicas empregadas no mantemento e construción de embarcacións de madeira de tipoloxías tradicionais.
No ano 2024 a asociación recibiu una subvención da Deputación da Coruña para a construción do empanetado da cuberta de tres das nosas embarcacións. Tamén recibimos unha subvención do Concello de Outes para o mantemento xeral das nosas embarcacións. Estas subvencións permítennos manter a nosa flota nas condicións axeitadas para participar nas moitas mostras de cultura mariñeira nas que se dá a coñecer este importante patrimonio cultural.
Bicentenario do Poeta Francisco Anhon
En outubro de 2012 cumpríronse 200 anos do nacemento de Francisco Añón, a personalidade máis ilustre, querida e respectada por todos os outenses que oíron aos seus maiores referirse a el cun ton de auténtica reverencia, por ver na súa obra poética a expresión máis lograda tanto da beleza da terra que nos veu nacer como da nosa forma de ser, de relacionarnos co entorno e cos demais.
Por este motivo o 2012 estivo cheo de actos conmemorativos para homenaxear ó Poeta Anón no que foi chamado "O ano de Añón"
Video de presentación do Curso Poeta Añón - Eirado TVG 6/10/2012
Terra de Outes-Bicentenario Poeta Añón 1812-2012
Francisco Añón. O Poeta na memoria das xentes de Outes
Proxecto conxunto da Asociación Terra de Outes e o Concello de Outes
“Reconstrución dun barco Sancosmeiro e recuperación da carpintería de ribeira”.
Financiado pola Consellería do Mar da Xunta de Galiza (programa de axudas autonómicas para proxectos ao abeiro das estratexias de desenvolvemento local participativas . Galp 4 Costa sostible ) e polo FEMPA (Fondo Europeo Marítimo, de Pesca e da Acuicultura) da UE nun 98%, con cotas do 30% e do 70% respectivamente.
Importe total do proxecto: 147.088,01 €
Importe subvencionable: 145.394,01 €
Subvención Fempa: 99.740,29 €
Subvención Autonomía: 42.745,84 €
Total subvención: 142.486,13 €
A cofinanciación por cada socio é:
Concello de Outes: 38.076,13 €
Asociación Terra de Outes: 4.410,00 €
Desenvolverase no Espazo Museístico Estaleiro Ciprián durante os anos 2024, 2025 e 2026.
O proxecto que imos desenvolver está chamado a ser a “obra viva” deste Museo da cultura mariñeira, posto que lle engadirá:
a construción dun bote Sancosmeiro, embarcación senlleira de Outes que se empregaba para transporte de persoas e mercadorías,
a construción dunha maqueta, a escala 1:3, desa embarcación, que se realizará no curso de carpintería,
o establecemento dunha mariña de 5 embarcación tradicionais, algunha en reparación no propio estaleiro e outras varadas ou fondeadas arredor, ou navegando a vela e remo...
Financiado pola Consellería do Mar da Xunta de Galiza (programa de axudas autonómicas para proxectos ao abeiro das estratexias de desenvolvemento local participativas . Galp 4 Costa sostible ) e polo FEMPA (Fondo Europeo Marítimo, de Pesca e da Acuicultura) da UE nun 98%, con cotas do 30% e do 70% respectivamente.
